एकता दौड

राष्ट्रीय एकात्मतेसाठी नाशिककर धावले

          नाशिक, दि.31- .  लोहपुरुष सरदार वल्लभभाई पटेल यांच्या जयंती निमित्त  राष्ट्रीय एकात्मतेचा संदेश देण्यासाठी शहर पोलीस आयुक्तालयातर्फे आयोजित करण्यात आलेल्या ‘एकता दौड’मध्ये नाशिककर जनतेने उत्स्फुर्तपणे सहभाग नोंदविला.

          पोलीस आयुक्त रविंद्र सिंगल आणि पोलीस विशेष महानिरीक्षक चेरींग दोरजे यांच्या हस्ते पोलीस कवायत मैदान येथे एकता दौडचा शुभारंभ करण्यात आला.

 राष्ट्रीय एकात्मतेसाठी सर्वांनी एकत्रीत प्रयत्न करावे आणि देशाला तसेच जगाला आपण एक असल्याचा संदेश द्यावा, असे आवाहन श्री.सिंगल यांनी शुभारंभ प्रसंगी केले. त्यांनी उपस्थितांना राष्ट्रीय एकात्मतेची शपथ दिली

 यावेळी महाराष्ट्र पोलीस  प्रशिक्षण अकॅडमीच्या संचालक अश्वती दोरजे, उपायुक्त रघुनाथ गावडे, सुखदेव बनकर, पोलिस उपायुक्त श्रीकृष्ण कोकाटे, लक्ष्मिकांत पाटील, माधुरी कांगणे, विजयकुमार मगर आदी उपस्थित होते.

          एकता दौडच्या माध्यमातून राष्ट्रीय एकात्मतेसोबत व्यसनमुक्ती, नो हॉर्न, महिला सक्षमीकरण आदी संदेश देण्यात आले. शाळकरी विद्यार्थ्यांपासून वयोवृद्धांपर्यंत सर्व गटातील नागरिक या उपक्रमात सहभागी झाले होते. पाच किलोमीटरच्या या दौडचा समारोप गंगापूर रोड, कॉलेजरोड, कॅनडा कार्नरमार्गे पोलीस कवायत मैदान येथेच झाला.

          मालेगावी एकता दौडचे आयोजन

                     

        नाशिक ग्रामीण पोलीस व मालेगाव पोलीस दल यांच्या संयुक्त विद्यमाने मालेगाव येथील पोलीस परेड मैदान येथे एकता दौडचे आयोजन करण्यात आले. एकता दौडचा शुभारंभ पोलीस अधिक्षक संजय दराडे यांच्या हस्ते हिरवी झेंडी दाखवून  करण्यात आला.

पोलीस परेड ग्राऊंड येथून एकात्मा चौक, फुले पुतळा, मोसम पुल, शिवाजी पुतळा, आंबेडकर पुतळा, आंबेडकर पुल, दत्तमंदीर संगमेश्वर गांधी पुतळा मार्गे पोलीस परेड ग्राऊंड मैदान येथे दौडचा समारोप झाला.

यावेळी अप्पर जिल्हाधिकारी लक्ष्मण राऊत, अपर पोलीस अधिक्षक निलोत्पल, माजी आमदार मौलाना मुफती इस्माईल, उपविभागीय अधिकारी अजय मोरे, तहसिलदार ज्योती देवरे, पोलीस उपअधिक्षक रत्नाकर नवले ,अजित हगवणे, मनपा उपआयुक्त कापडणीस आदी उपस्थित होते.

 एकता दौडमध्ये विद्यार्थी-विद्यार्थीनी, विविध सामाजिक संस्थेचे कार्यकर्ते, जिल्हा क्रिडा अधिकारी कार्यालय नाशिक, क्रिडा शिक्षक संघटना मालेगाव, राजकीय क्षेत्रातील मान्यवर, पोलीस विभागातील अधिकारी, कर्मचारी, नागरिक   यांनी सहभाग घेतला.

यावेळी मान्यवरांच्या हस्ते 6 जानेवारी 2019 रविवार रोजी आयोजित करण्यात येणाऱ्या ‘मालेगाव मॅरेथॉन 2019-पर्व दुसरे’ या फलकाचे अनावरण करण्यात आले. एकता दौडमध्ये सर्व सहभागी नागरिकांना मान्यवरांच्या हस्ते प्रमाणपत्र प्रदान करण्यात आले.

----