मतदारनोंदणी विशेष मोहिम

नाशिक विभाग पदवीधर मतदारसंघ मतदारनोंदणी

येत्या शनिवार-रविवारी विशेष मोहिम

नाशिक दि. 19 – नाशिक विभाग पदवीधर मतदारसंघाच्या नव्याने मतदार याद्या तयार करण्याचा कार्यक्रम भारत निवडणूक आयोगाने जाहीर केला आहे. त्यानुसार मतदारनोंदणी अभियान सुरु असून या अभियानाला गती देण्यासाठी  येत्या शनिवार- रविवारी (दि. 22 व 23 ऑक्टोबर) रोजी विशेष मोहीम राबविण्यात येणार असल्याची माहिती विभागीय आयुक्त तथा नाशिक पदवीधर मतदारसंघाचे मतदार नोंदणी अधिकारी श्री. एकनाथ डवले यांनी प्रसिद्धीपत्रकाद्वारे दिली आहे.

नाशिक विभागातील सर्व पदनिर्देशित अधिकारी यांच्या कार्यालयात तसेच महसूल मंडळ कार्यालयात दि. 22 व 23 ऑक्टोबर या शासकीय सुट्ट्यांच्या दिवशी जास्तीत जास्त मतदार नोंदणी होण्याच्या दृष्टीने हे अभियान राबविण्यात येणार आहे. 

नाशिक पदवीधर मतदारसंघाची 1 ऑक्टोबरपासून मतदारनोंदणी सुरु झाली आहे. मात्र, दि. 15 ऑक्टोबरपर्यंत झालेली मतदार नोंदणी पाहता मतदारजागृती अभियानांतर्गत विशेष मोहिम हाती घेऊन अधिकाधिक मतदार नोंदणी केली जाणार आहे.

पात्र मतदारांनी  (दि. 1 नोव्हेंबर 2013 पूर्वी पदवी/पदविका प्राप्त असेल असे) मतदार नोंदणी करण्यासाठी नमुना क्र. 18 मध्ये अर्ज करुन अर्जासोबत पदविका/पदवीधर असल्याबाबत राजपत्रित अधिकारी यांनी साक्षांकित केलेले विद्यापीठाचे प्रमाणपत्र, फोटो असलेले निवडणूक ओळखपत्र असल्यास त्याची प्रत, रहिवास पुरावा आणि पासपोर्ट साईज फोटो जोडून संबंधित पदनिर्देशित अधिकारी यांच्या कार्यालयात अथवा संबंधित तहसील कार्यालयात अथवा जिल्हाधिकारी कार्यालयात जमा करण्याचे आवाहन करण्यात आले आहे.

तसेच शासकीय/निमशासकीय कार्यालये, शैक्षणिक संस्था, सहकारी संस्था, बॅंका या कार्यालयातील कार्यालयप्रमुख यांनी त्यांचे कार्यालयात कार्यरत असलेल्या पात्र पदवीधर अधिकारी व कर्मचारी यांच्याकडून फॉर्म क्र. 18 भरुन घ्यावेत आणि आवश्यकत त्या कागदपत्रांसह साक्षांकन करुन कार्यालयामार्फत संबंधित उपजिल्हा निवडणूक अधिकारी, जिल्हाधिकारी कार्यालय अथवा तहसील कार्यालय वा महसूल मंडळ कार्यालय यापैकी कोणत्याही एका ठिकाणी अर्ज जमा करावेत, असे आवाहनही करण्यात आले आहे.

                                                ****