आडगाव पोलिस ठाण्याची नवीन इमारत राज्यासाठी पथदर्शी
-
पालकमंत्री गिरीश महाजन
नाशिक, दि. 19:- आडगाव पोलिस ठाण्याची नवीन इमारत अद्ययावत आणि सुसज्ज असून राज्यातील इतर पोलिस ठाण्यांसाठी ती पथदर्शी इमारत
ठरेल, असे प्रतिपादन राज्याचे वैद्यकिय शिक्षणमंत्री व जलसंपदा मंत्री तथा
जिल्ह्याचे पालकमंत्री गिरीष महाजन यांनी केले.
शहर पोलिस आयुक्तालयांतर्गत आडगाव पोलिस ठाण्याच्या
नुतन इमारतीच्या उद्घाटनप्रसंगी ते बोलत होते. यावेळी आमदार बाळासाहेब सानप,
प्रा.देवयानी फरांदे, सीमा
हिरे, जिल्हाधिकारी राधाकृष्णन बी., पोलिस
आयुक्त रविंद्रकुमार सिंगल, जिल्हा पोलिस अधिक्षक संजय दराडे
आदी उपस्थित होते.
श्री. महाजन म्हणाले, शहरातील वाढत्या
लोकसंख्येच्या काळात अशा अद्ययावत पोलिस ठाण्यांची गरज आहे. इमारतीची रचना आणि तिच्यातील दर्जेदार
सुविधांमुळे पोलिस दलाचे मनोबल वाढेल. गुन्ह्यांना
आळा घालण्यासाठी पोलिसांना सुविधा देण्याचा प्रयत्न करण्यात येत आहे. पोलिसांचे
प्रश्न सोडविण्याकडेदेखील लक्ष देण्यात येत आहे. जिल्ह्यातही पोलिसांसाठी 2200 घरे निर्माण करण्यात येत आहे, असे ते म्हणाले.
शहराची सुरक्षा वाढवण्यासाठी नाशिक शहरासाठी सीसीटीव्ही
यंत्रणा उभारण्याची कार्यवाही लवकरच करण्यात येईल, त्याबाबतची तयारी अंतिम
टप्प्यात असल्याचे श्री. महाजन यांनी सांगितले.
पोलिस आयुक्त सिंघल म्हणाले, शहरातील मुंबई
नाका व म्हसरुळ पोलिस ठाण्यांसाठी नवीन जागा मिळवून चांगल्या सुसज्ज इमारती
देण्याचा प्रयत्न आहे. शहर पोलिस मुख्यालयासाठी देखील 22 मजली इमारत, सुसज्ज
फायरींग रेंज आदी देण्याचे प्रस्तावित आहे, असे ते म्हणाले.
याप्रसंगी आमदार सानप, उपायुक्त लक्ष्मीकांत
पाटील आदींनी विचार व्यक्त केले.
यावेळी इमारतीच्या निर्मितीमध्ये योगदान
दिलेल्या पोलिस गृहनिर्माण महामंडळाच्या अधिक्षक अभियंता वृंदा गिरासे, कार्यकारी
अभियंता अरुण नागपुरे,आर्किटेक्ट प्रविण पगार व ठेकेदार शैलेश चापसे यांचा
मान्यवरांच्या हस्ते सत्कार करण्यात आला. आडगाव पोलिस ठाण्यात 8 अधिकाऱ्यांसह 91
पोलिस कर्मचारी नागरीकांसाठी कार्यरत असतील. नवीन इमारतीचे क्षेत्रफळ 2190
स्क्वेअर मीटर असून फर्निचर, बिनतारी यंत्रणा, तपासी अंमलदार, पोलिस अधिकाऱ्यांचे
सुसज्ज कक्ष, महिला व पुरुष पोलिसांसाठी स्वतंत्र विश्रांती कक्ष, कोठडी,
नागरीकांसाठी स्वागत कक्ष असणारी ही अद्ययावत इमारत आहे.
000000
No comments:
Post a Comment